GJKKO vijon gjyqin ndaj Metës dhe Kryemadhit pa avokatë, pezullon afatet e paraburgimit për ish-presidentin

Gjykata e Posaçme kundër Korrupsionit dhe Krimit të Organizuar (GJKKO) vendosi të enjten që procesi ndaj ish-presidentit Ilir Meta dhe Monika Kryemadhit të vijojë edhe pa praninë e avokatëve, nëse bojkoti i tyre vazhdon. Gjykata pezulloi gjithashtu afatet e paraburgimit për Metën.

Avokatët e zgjedhur nga të pandehurit e bojkotuan seancën, ndërsa edhe dy avokatët e caktuar nga ndihma juridike falas refuzuan thirrjen. Njëra prej tyre deklaroi se po bojkotonte, ndërsa tjetri argumentoi se çështja nuk kualifikohej për ndihmë juridike falas.

Gjoba për avokatët

Trupi gjykues i rrëzoi kërkesat e të katër avokatëve për t’u përjashtuar nga procesi. Dy avokatët e zgjedhur u gjobitën me nga 20 mijë lekë secili, ndërsa dy avokatët e ndihmës juridike me nga 5 mijë lekë. Seanca e radhës u caktua më 29 tetor në orën 11:00, kur gjykata pritet të vendosë nëse procesi do të vijojë pa mbrojtës.

Në seancë nuk ishin të pranishëm prokurorët e çështjes; SPAK u përfaqësua nga prokurori Vladimir Mara.

Meta: Taktikë zvarritjeje

Ilir Meta deklaroi në sallë se është gati të mbrohet vetë dhe e cilësoi situatën si taktikë për zvarritjen e procesit. Ai tha se kryetari i Dhomës Kombëtare të Avokatisë e kishte njoftuar se po atë ditë do të kishte një takim në Këshillin e Lartë Gjyqësor për situatën e krijuar. Meta pretendoi gjithashtu se prokuroria mungoi qëllimisht dhe dërgoi një prokuror tjetër për të mundësuar pezullimin e afateve të paraburgimit të tij.

Ish-presidenti dhe ish-bashkëshortja e tij gjykohen nga GJKKO pas akuzave të ngritura nga SPAK për korrupsion, pastrim parash dhe fshehje pasurie. Të dy e kanë cilësuar procesin si të motivuar politikisht.