Gërvalla dhe Sveçla refuzojnë dorëheqjen për rastin Zekaj; protesta në Pejë e Mitrovicë: “Edhe sa Arlinda?”

Ministrja e Drejtësisë, Donika Gërvalla, dhe ministri i Punëve të Brendshme, Xhelal Sveçla, paraqitën të premten raportet për trajtimin e rastit të Arlinda Zekajt, por hodhën poshtë kërkesat e protestuesve për dorëheqje.

“Nuk u vra pa paralajmërim”

“Konstatimi më shqetësues është se Arlinda Zekaj nuk është vrarë pa paralajmërim”, tha Gërvalla, duke shtuar se raporti është vetëm pjesërisht i plotë, sepse disa institucione nuk janë përgjigjur. Sipas saj, Zekaj e kishte denoncuar dhunën për herë të parë më 10 korrik. Gjykata Themelore në Pejë, që duhej të vendoste brenda shtatë ditëve për kundërshtimin e saj të 9 shtatorit, e caktoi seancën vetëm për 24 shtator, dhe pas shtyrjesh ajo u mbajt më 13 tetor.

Sveçla tha se 11 policë janë pezulluar dhe se, me kërkesë të Kurtit, janë identifikuar 155 raste aktive me rrezikshmëri të lartë. Megjithatë, të dy ministrat thanë se largimi i tyre nuk do të ndihmonte. “E kuptoj indinjatën dhe mllefin e protestuesve”, tha Sveçla.

Protesta dhe vendimi i KPK-së

Me thirrjet “Edhe sa Arlinda?” dhe “Drejtësi për Arlindën”, qytetarët marshuan në Pejë nga Komuna te Gjykata dhe Prokuroria, ndërsa në Mitrovicë protestuesit shkuan nga sheshi “Isa Boletini” deri te stacioni i policisë. “Ne do të vazhdojmë të protestojmë deri në dorëheqjen e tyre”, tha Neri Ferizi nga organizata “Fourth Wave”. Ehat Miftaraj nga Instituti i Kosovës për Drejtësi tha për REL se konferenca e ministrave duhej të mbyllej me dorëheqje.

Këshilli Prokurorial i Kosovës publikoi arsyetimin e pezullimit të kryeprokurores së Pejës, Lumturije Vuçetaj, dhe prokurores së rastit, Arlinda Nallbani-Gacaferri. Sipas KPK-së, pasojat fatale erdhën si rezultat i neglizhencës së vazhdueshme të Vuçetajt, ndërsa prokurorja, më 22 tetor, kishte udhëzuar që i pandehuri A.S., i cili e kishte kanosur Zekajn, të intervistohej si dëshmitar. Ndaj të dyjave është hapur procedurë disiplinore.