Gazmend Hoxha jep dorëheqjen nga drejtimi i Policisë së Kosovës pas vrasjes së Zekajt: “Dorëheqje morale”

Drejtori i përgjithshëm i Policisë së Kosovës, Gazmend Hoxha, dha të premten dorëheqjen, pesë ditë pas vrasjes së Arlinda Zekajt në Vitomiricë të Pejës, rast që ka shkaktuar protesta në disa qytete dhe kërkesa për përgjegjësi institucionale.

Zyra e Kryeministrit njoftoi se Albin Kurti e ka pranuar dorëheqjen dhe e ka liruar Hoxhën nga detyra. Me propozim të ministrit të Punëve të Brendshme, Xhelal Sveçla, ushtrues detyre i drejtorit të përgjithshëm u caktua Fehmi Hoti. “Qeveria e Republikës së Kosovës e çmon kontributin dhe angazhimin e z. Hoxha përgjatë mandatit të tij”, thuhet në njoftim.

“Lidhet me dorëheqje morale”

I pyetur nga Radio Evropa e Lirë nëse largimi lidhet me trajtimin institucional të rastit, Hoxha u përgjigj se ai “lidhet me dorëheqje morale”. Ai nuk iu përgjigj pyetjes nëse me këtë nënkupton se ndien përgjegjësi për neglizhencat në trajtimin e rastit.

Një ditë më parë, Policia kishte pezulluar 11 zyrtarë në Pejë, mes tyre ushtruesin e detyrës së drejtorit rajonal, shefin e hetimeve rajonale dhe katër hetues. Sipas gjetjeve paraprake të Inspektoratit Policor, Policia nuk e kishte dokumentuar zbatimin e urdhrit për mbrojtje të lëshuar më 7 shtator dhe e kishte ekzekutuar me gjashtë ditë vonesë një vendim tjetër të gjykatës, të 16 tetorit.

Tre vjet e gjysmë në krye

Hoxha ishte emëruar drejtor i përgjithshëm më 8 mars 2023, me propozim të Sveçlës, dhe e mori detyrën më 13 mars, duke pasuar pikërisht Fehmi Hotin, që atëherë drejtonte Policinë si ushtrues detyre. Ai ishte pjesë e Policisë që nga viti 2000 dhe kishte drejtuar, ndër të tjera, departamentin kundër krimit të organizuar.

Dorëheqja vjen ndërsa Kuvendi i Kosovës ka ngritur një komision hetimor për veprimet dhe mosveprimet e institucioneve në këtë rast.