Elona Hoxha sqaron paketën kundër dhunës: deri në 2 vjet burg për armë në tubime, gjobë për maskimin

Ministria e Drejtësisë doli të hënën për të shpjeguar paketën ligjore kundër dhunës në protesta, të prezantuar një ditë më parë nga kryeministri Edi Rama. Në një intervistë për Vizion Plus, zëvendësministrja Elona Hoxha tha se ajo përbëhet nga gjashtë instrumente ligjore dhe ndërtohet mbi parimin se protesta paqësore mbrohet, dhuna ndëshkohet dhe dëmin e paguan ai që e shkakton.

Çfarë ndryshon në Kodin Penal

Sipas Hoxhës, do të ndëshkohet penalisht personi që vazhdon të qëndrojë në një tubim pas paralajmërimit të policisë, duke ditur se po ushtrohet dhunë ose po dëmtohet prona. Kush kapet me armë apo sende të rrezikshme gjatë tubimeve rrezikon deri në dy vjet burg. Fshehja e fytyrës, kur ka dhunë ose rrezik konkret për dhunë, dënohet me gjobë ose deri në gjashtë muaj burg, me përjashtim të arsyeve shëndetësore, fetare apo profesionale dhe të atyre që e zbulojnë fytyrën me urdhër të policisë.

Paketa përfshin gjithashtu masa kundër nxitjes së dhunës në rrjetet sociale, kanosjes dhe përndjekjes online, si dhe përdorimit abuziv të inteligjencës artificiale për të dëmtuar individë.

Të miturit dhe ndihma juridike

Zëvendësministrja tha se mbrojtja e të miturve të shoqëruar në komisariate është “e panegociueshme” dhe se fëmijët nuk duhet të përdoren si instrumente të konfliktit politik. Ministria ka vënë në dispozicion të komisariateve dhe gjykatave një listë avokatësh për të miturit dhe studentët, ndërsa qytetarët pa mundësi financiare mund të marrin këshillim falas në numrin 0800 10 10.

Në mëngjes, ministri i Drejtësisë, Toni Gogu, kishte paralajmëruar në rrjetet sociale se përgjegjësia penale nuk nis në moshën 18 vjeç. “Sipas legjislacionit shqiptar, të miturit mbajnë përgjegjësi penale nga mosha 14 vjeç për kryerjen e krimeve dhe nga mosha 16 vjeç për kryerjen e kundërvajtjeve penale”, shkroi ai, duke shtuar se përfshirja në dhunë sjell pasoja edhe për të miturit.