Drafti i KE-së, sipas REL: Kosova pa përparim në fushat themelore, Mali i Zi drejt fundit të negociatave

Kosova, së bashku me Serbinë dhe Bosnjë e Hercegovinën, renditet mes vendeve që nuk kanë shënuar përparim në fushat themelore të procesit të anëtarësimit në Bashkimin Evropian. Kështu thuhet në draftin e komunikatës vjetore të Komisionit Evropian për politikën e zgjerimit, të cilin e ka parë Radio Evropa e Lirë dhe që pritet të publikohet javën e ardhshme.

Fushat themelore përfshijnë sundimin e ligjit, institucionet demokratike, reformën e administratës publike dhe kriteret ekonomike, dhe përcaktojnë ritmin e përgjithshëm të negociatave.

Ndikim mbi gjykatat dhe normalizimi

Sipas draftit, Kosova përballet me ndikim politik dhe të grupeve të interesit mbi gjykatat dhe prokurorinë. Si risi, dokumenti thekson se përafrimi i plotë i Kosovës me politikën e përbashkët të jashtme dhe të sigurisë së BE-së paraqitet për herë të parë në kapitullin 31.

Komisioni rikujton se rruga evropiane e Serbisë dhe Kosovës lidhet me përparimin në normalizimin e marrëdhënieve. “Zbatimi i Marrëveshjes për rrugën drejt normalizimit dhe i Aneksit të saj të zbatimit mbetet i pamjaftueshëm”, thuhet në dokument, që shton se mungesa e përparimit “ka kosto politike dhe ekonomike” dhe rrezikon t’i lërë të dyja palët prapa. Serbia përmendet edhe mes vendeve me rrezik të theksuar të “kapjes së shtetit”.

Mali i Zi, prijësi i procesit

Në të kundërt, Mali i Zi përshkruhet si vendi që prin zgjerimin. Sipas vlerësimit, Podgorica i ka përmbushur kriteret përfundimtare në të gjithë kapitujt dhe mund t’i mbyllë negociatat deri në fund të vitit. Komisioni vlerëson ndryshimet kushtetuese për pavarësinë e këshillave gjyqësor e prokurorial dhe përafrimin e politikës së vizave me BE-në nga 31 tetori 2026.

Drafti thotë gjithashtu se deri në shtator janë disbursuar 193.3 milionë euro grante nga 1.6 miliardë eurot e Planit të Rritjes për Ballkanin Perëndimor, për 90 hapa reformues të përmbushur, dhe kërkon përshpejtimin e zbatimit.