Caka: Shtatë policë të pezulluar për protestat, 55 ankesa qytetarësh për tejkalim kompetencash

Zëvendësministrja e Brendshme, Silva Caka, pranoi të premten se gjatë përplasjeve me protestuesit në Tiranë ka pasur raste kur efektivët e policisë kanë tejkaluar kompetencat. Ajo foli në Korçë, në margjinat e një takimi për luftën kundër trafikimit të fëmijëve.

"Janë aktualisht 7 efektivë të pezulluar nga vetë Policia e Shtetit", tha Caka. Sipas saj, të gjithë janë nën hetim nga Agjencia e Mbikëqyrjes së Policisë (AMP), ndërsa katër efektivë të tjerë po hetohen kryesisht nga vetë AMP.

55 ankesa

Caka bëri të ditur se deri tani janë depozituar të paktën 55 ankesa nga qytetarë të ndryshëm, që pretendojnë se efektivët shkuan përtej detyrës. Ajo tha se të gjitha ankesat do të shqyrtohen dhe qytetarët do të marrin përgjigje.

Sipas zëvendësministres, policia në disa raste nuk ka reaguar, në të tjera ka ndërhyrë në mënyrë proporcionale dhe në disa raste ka tejkaluar kompetencat. Ajo paralajmëroi gjithashtu se të rinjtë dhe fëmijët që marrin pjesë në protesta rrezikojnë të përfshihen në situata të nxitura nga të tjerë dhe të mbajnë përgjegjësi penale.

Arrestim pas tubimit

Po të premten, Drejtoria Vendore e Policisë Tiranë njoftoi arrestimin e një protestuesi të dyshuar se i rezistoi policisë dhe hodhi sende të forta drejt efektivëve dhe institucioneve gjatë tubimit të një dite më parë, kur u lëndua një polic. Një person tjetër u shpall në kërkim, i dyshuar se goditi me sende të forta një efektiv gjatë tubimit dy ditë më parë.