Bizneset e Tiranës sërish në shënjestër: thyhen xhamat e një banke e të një dyqani celular, digjet një kioskë

Bizneset e Tiranës pësuan sërish dëme të shtunën, gjatë protestës së 12-të në kryeqytet. Sipas Top Channel dhe ATSH, gjatë marshimit në Rrugën e Kavajës protestuesit thyen xhamat e një banke të nivelit të dytë dhe shkatërruan bankomatin e saj. Emri i bankës nuk u bë i ditur.

Më pas, në rrugën “Vasil Shanto”, u godit fasada prej xhami e një dyqani të një operatori celular. Sipas ATSH, për ta thyer vitrinën u përdorën barriera metalike dhe shufra hekuri, ndërsa grupi u largua menjëherë nga vendi.

Kioska në flakë dhe kosha si barrikada

Në zonën qendrore, protestuesit i vunë flakën një kioske pranë Bankës së Shqipërisë, ngjitur me një stacion autobusi. Në disa rrugë, përfshirë Rrugën e Durrësit, u dogjën kosha mbeturinash që u zhvendosën në mes të rrugës për të penguar qarkullimin, ndërsa u hoqën edhe barrierat e hekurit të trotuareve.

ATSH raportoi gjithashtu se shishe me benzinë u hodhën drejt Ministrisë së Bujqësisë dhe Bashkisë së Tiranës, ku morën flakë hyrjet kryesore, por zjarrfikësit e vunë situatën nën kontroll.

Kostoja për biznesin

Policia e Shtetit deklaroi se dhuna dhe dëmtimi i pronës publike e private janë “të papranueshme” dhe ndëshkohen me ligj, duke u kërkuar protestuesve të distancohen nga personat e maskuar.

Dëmet e reja vijnë pak ditë pasi, në takimin e 21 tetorit te Banka e Shqipërisë, u raportua se nga protestat e mëparshme ishin dëmtuar 45 degë bankare dhe 53 bankomate. Bilanci i dëmeve të së shtunës nuk ishte bërë ende publik në mbrëmje.