Behgjet Pacolli 7 orë në SPAK për aeroportin e Vlorës: Kam bërë një denoncim penal

Biznesmeni Behgjet Pacolli qëndroi të hënën rreth shtatë orë në ambientet e Prokurorisë së Posaçme kundër Korrupsionit dhe Krimit të Organizuar. Ai ishte thirrur për t’u pyetur si person në dijeni në lidhje me çështjen e Aeroportit të Vlorës, për të cilën kishte bërë vetë kallëzim, sipas Top Channel.

“Unë vetëm kam bërë një denoncim penal për padrejtësitë që janë bërë deri tani në lidhje me aeroportin e Vlorës”, u tha Pacolli gazetarëve pas daljes. Ai u pyet edhe nëse prokurorët e kishin pyetur për ndonjë interes të Belinda Ballukut, ndaj së cilës SPAK ka komunikuar akuza javën e kaluar, por nuk dha detaje.

Avokati: Çështja edhe në arbitrazh

Avokati i tij, Eduart Halimi, tha se Pacolli u pyet si person që ka dijeni për atë që “ka ndodhur dhe po ndodh” në Aeroportin e Vlorës. Sipas tij, për shkak të hetimeve intensive dhe se çështja ndodhet edhe në Gjykatën e Arbitrazhit, mbrojtja nuk mund të japë komente të tjera.

“Askush nuk është mbi ligjin”

Më vonë, Pacolli shkroi në Facebook se para prokurorëve paraqiti në mënyrë të detajuar fakte, dokumente dhe rrethana mbi atë që e quajti ndërhyrje të paligjshme në strukturën e pronësisë, shpërfillje të vendimeve gjyqësore dhe cenim të pronës private. “Nuk e kam humbur shpresën se në Shqipëri po bëhet drejtësi”, shkroi ai, duke shtuar se do të vazhdojë të bashkëpunojë plotësisht me SPAK. “Askush nuk është mbi ligjin. Prona private dhe vendimet e gjykatave duhet të respektohen”, përfundoi ai.