Banka e Shqipërisë pas dëmeve në degë dhe bankomate: Depozitat janë të sigurta, pagesat funksionojnë

Banka e Shqipërisë reagoi të hënën pas dëmtimeve që pësuan disa degë bankare dhe bankomate gjatë protestave të ditëve të fundit, duke theksuar se situata nuk cenon kursimet e qytetarëve.

Në deklaratën e saj, banka qendrore shkruan se po i ndjek me shqetësim zhvillimet dhe pranon se incidentet kanë shkaktuar dëme materiale si dhe kufizime të përkohshme në shërbimet e disa degëve. Sipas institucionit, këto kufizime janë vendosur për të mbrojtur sigurinë fizike të punonjësve dhe të klientëve.

Banka e Shqipërisë nënvizon se sistemi i pagesave ka vijuar të funksionojë normalisht dhe pa ndërprerje. Dëmtimi i një pjese të infrastrukturës fizike, sipas saj, nuk rrezikon as depozitat dhe as qëndrueshmërinë financiare të bankave, ndaj qytetarët mund të jenë të qetë se “kursimet e tyre janë të mbrojtura”.

Thirrje për mbrojtjen e bankave

Institucioni u bëri thirrje qytetarëve të respektojnë dhe të mbrojnë ambientet bankare dhe stafin e tyre, duke kujtuar se bankat u shërbejnë familjeve që mbajnë kursime, njerëzve që marrin paga e pensione dhe bizneseve që paguajnë punonjësit.

Bizneseve dhe klientëve iu kërkua të ndjekin njoftimet zyrtare të bankave të tyre dhe, kur është e mundur, të përdorin kanalet alternative të shërbimit. Banka qendrore shtoi se është në komunikim të vazhdueshëm me bankat tregtare dhe me institucionet përkatëse për monitorimin e situatës dhe masave të sigurisë.