Banka e Shqipërisë, ligji i ri në Komisionin e Ligjeve: ndalohet financimi i qeverisë, debat për Guvernatorin

Zëvendësministri i Financave, Endrit Yzeiraj, prezantoi të martën në Komisionin e Ligjeve projektligjin e ri „Për Bankën e Shqipërisë”, të cilin e quajti një lloj „kushtetute” të sistemit monetar dhe financiar. Sipas tij, ligji është ndër hapat kryesorë për mbylljen e kapitullit 17 të negociatave me BE-në, për politikën ekonomike dhe monetare.

Pesë risitë e projektligjit

Yzeiraj tha se projektligji e përcakton qartë stabilitetin e çmimeve si objektivin parësor të bankës qendrore, nga i cili burojnë të gjitha qëllimet e tjera. Ai ndalon shprehimisht financimin monetar të qeverisë dhe të institucioneve publike, duke ngritur, sipas zëvendësministrit, një „mur” mes bankës qendrore dhe buxhetit. Për herë të parë krijohen komiteti monetar, komiteti i stabilitetit financiar dhe komiteti i auditit, ndërsa kapitali i Bankës së Shqipërisë rritet nga 2.5 në 6 miliardë lekë.

„Ekonomia shqiptare, fatmirësisht, nuk ka patur pas vitit ’97 kriza financiare”, tha Yzeiraj, duke shtuar se ligji synon përafrimin përfundimtar me detyrimet që burojnë nga traktati i BE-së.

Garancitë për Guvernatorin

Debati u përqendrua te mbrojtja e Guvernatorit. Deputeti socialist Damian Gjiknuri pyeti nëse garancitë ndaj masave shtrënguese nuk do të ishin më të sigurta në Kushtetutë, siç ndodh me Presidentin, deputetët dhe gjyqtarët e Gjykatës së Lartë e të Kushtetueses. Zëvendësguvernatorja Holta Zaçaj, ish-kryetare e Gjykatës Kushtetuese, u përgjigj se garancitë procedurale mund të qëndrojnë edhe në ligj, edhe pse niveli kushtetues do të ishte i preferueshëm. Ajo sqaroi se nuk bëhet fjalë për imunitet nga ndjekja penale, por për pezullimin e përkohshëm nga detyra, dhe pranoi se BE-ja nuk e kërkon këtë si detyrim. „Nuk mbrohet guvernatori si person. Ne mbrojmë institucionin duke mbrojtur guvernatorin”, tha Zaçaj.

Drafti i publikuar për konsultim në korrik parashikonte që Guvernatori dhe zëvendësguvernatorët të mos arrestoheshin pa autorizimin e Gjykatës Kushtetuese, përveç rasteve të flagrancës, sipas Euronews Albania.