Banka e Shqipërisë: 94% e ndërmarrjeve dalin me fitim, vetëm 31% kanë një kredi për të shlyer

Shumica dërrmuese e bizneseve shqiptare e mbyllën gjysmën e parë të vitit me fitim, sipas vrojtimit të Bankës së Shqipërisë mbi financat e ndërmarrjeve. Rreth 94% e 1,355 firmave të anketuara, të madhësive të ndryshme dhe nga të gjithë sektorët kryesorë të ekonomisë, raportuan se dolën me rezultat pozitiv.

Firmat e vogla përmirësohen më shumë

Shitjet dhe rezultati financiar kanë ecuri pozitive, me përmirësimin më të dukshëm te ndërmarrjet e vogla. Treguesi është zbutur krahasuar me gjashtëmujorin e mëparshëm, por mbetet më i mirë se një vit më parë. Konkurrenca dhe kostot e prodhimit renditen si sfidat kryesore. Për firmat e mëdha, shqetësim tjetër është gjetja e tregjeve, ndërsa për të voglat peshë të veçantë kanë aksesi në financim dhe kostoja e tij.

Më pak borxh bankar, por më i rëndë

Rreth 57% e ndërmarrjeve thonë se mbështeten vetëm te të ardhurat nga shitjet për të financuar aktivitetin. Vetëm 31% kanë aktualisht një hua për të shlyer, 4 pikë përqindjeje më pak se në gjashtëmujorin e kaluar dhe rreth 2 pikë më pak se një vit më parë. Ndërtimi mbetet sektori me peshën më të lartë të huamarrësve, rreth 40%, ndërsa shërbimet kanë më të ulëtën, 22%.

Paradoksalisht, edhe pse më pak firma kanë kredi, raporti mesatar i huasë ndaj kapitalit është rritur në rreth 79%. Nga ana tjetër, 81% e huamarrësve thonë se pagesat e kredive zënë deri në 20% të të ardhurave të tyre. Marrëdhënia me bankat vlerësohet e rëndësishme, por procesi i marrjes së kredisë perceptohet ende i vështirë, sidomos nga firmat e vogla.

Për gjashtëmujorin e dytë të 2026-s, bizneset presin që kërkesa për kredi të mbetet pozitive, edhe pse pak më e zbutur, dhe shprehen optimiste për investimet dhe zgjerimin e aktivitetit.