Balla publikon pamje të të maskuarve te selia e PD: Aty është depoja e molotovëve

Kreu i grupit parlamentar të Partisë Socialiste, Taulant Balla, publikoi të shtunën pasdite pamje me persona të maskuar që hynin dhe dilnin nga selia qendrore e Partisë Demokratike, ndërsa në qendër të Tiranës vijonin përplasjet mes protestuesve dhe policisë. Pamjet ai i shoqëroi me mbishkrimin “Depoja e molotovëve: SELIA E PD”.

Në një postim tjetër, Balla iu drejtua drejtpërdrejt kryetarit të PD-së, Sali Berisha, duke e akuzuar se “prapë” kishte sjellë zjarrvënës te selia e Partisë Socialiste. “E ke mbushur SHQUP-in me qindra litra benzinë ku fabrikohen molotovët. TURP!”, shkroi ai. Pretendimi i tij nuk u shoqërua me prova të tjera përveç pamjeve, ndërsa PD nuk kishte reaguar ndaj tij.

Mesazhet në Telegram

Më vonë, Balla publikoi mesazhe nga një grup në Telegram, ku sipas tij protestuesve u kërkohej të thyenin xhamat dhe të qëndronin të grumbulluar. Ai shkroi se gjithçka u bë “sipas urdhrave të dhëna përmes mesazheve”. Sipas Koha Jonë, socialisti publikoi edhe mesazhe që, sipas tij, tregonin një urdhër për t’i vënë zjarrin qendrës tregtare Toptani dhe hotelit Plaza, duke shtuar se në Toptani Center ndodheshin qindra klientë.

Akuzat e Ballës erdhën në kulmin e një dite të tensionuar, kur protestuesit hodhën molotovë e mjete piroteknike drejt policisë pranë selisë së PS-së dhe në zona të tjera të qendrës. Pamjet e policëve që përpiqeshin të shuanin flakët te uniforma e një kolegu u shpërndanë gjerësisht në rrjet.

Sali Berisha dhe PD nuk iu përgjigjën drejtpërdrejt këtyre akuzave gjatë pasdites. Në mbrëmje, kryetari i demokratëve e cilësoi ditën si protestë kombëtare në mbështetje të studentëve dhe akuzoi policinë për dhunë ndaj protestuesve.