Arrestohet 19-vjeçari nga Dibra i dyshuar se theu xhamat e Gjykatës Kushtetuese gjatë protestës

Policia e Tiranës arrestoi të premten një 19-vjeçar të dyshuar se dëmtoi godinën e Gjykatës Kushtetuese gjatë protestës së zhvilluar një ditë më parë në kryeqytet. Sipas njoftimit të policisë, i riu me inicialet O.C., banues në Dibër, u kap në flagrancë.

Xhamat e Kushtetueses

Ai dyshohet se me sende të forta theu xhamat e dritareve të godinës së Gjykatës Kushtetuese. Bashkë me të, policia procedoi në gjendje të lirë pesë persona të tjerë, të cilët dyshohen për veprime të kundërligjshme gjatë të njëjtit tubim. Identitetet e tyre nuk u bënë publike.

Akuzat

Materialet procedurale iu dërguan prokurorisë për veprat penale “Shkatërrimi i pronës”, “Organizimi dhe pjesëmarrja në grumbullime e manifestime të paligjshme”, “Prishja e qetësisë publike”, “Pengimi i qarkullimit të mjeteve të transportit”, “Kundërshtimi i punonjësit të policisë së rendit publik” dhe “Shkelja e rregullave mbi lëndët plasëse dhe djegëse”.

Arrestimi vjen pas protestës së 29 tetorit, ditë kur Kuvendi miratoi ligjin për Bankën e Shqipërisë mes tensioneve në sallë dhe kur studentët u mblodhën sërish para Ministrisë së Arsimit. Protestat studentore në Tiranë kanë hyrë në javën e tyre të tretë, me kërkesën për dorëheqjen e kryeministrit Edi Rama.

Arrestimet e mëparshme

Më 28 tetor, policia kishte arrestuar dy persona pas protestës te Ministria e Arsimit, të dyshuar se dogjën një kosh dhe bllokuan rrugën, ndërsa Antiterrori arrestoi një 33-vjeçar për kërcënim me bomba dhe dërgoi në prokurori 17 të tjerë për thirrje për dhunë. Po atë ditë, qeveria miratoi gjoba deri në 500 mijë lekë për protestuesit me fytyrë të mbuluar dhe një regjistër për të dyshuarit.