Ambasadori i OSBE-së, Tarran: Problemi kryesor është mungesa e dialogut, dhuna s’ka vend në demokraci

Ambasadori Michel Tarran, kreu i Prezencës së OSBE-së në Shqipëri, komentoi të mërkurën protestat e fundit në Tiranë, duke vënë theksin te mungesa e komunikimit mes institucioneve dhe qytetarëve. Ai foli për mediat në Elbasan, ku zhvillohen aktivitetet e Javës Evropiane të Demokracisë Lokale.

“Zëri i tyre nuk dëgjohet”

Sipas Tarran, problemi kryesor është “mungesa e dialogut”. “Njerëzit kanë përshtypjen se zëri i tyre nuk dëgjohet”, tha ai, duke shtuar se dialogu dhe konsultimi duhen mbështetur, veçanërisht në një vend që synon anëtarësimin në Bashkimin Evropian. Diplomati theksoi se pjesëmarrja e qytetarëve është një proces i vazhdueshëm: “Demokracia nuk është vetëm të votosh një herë në katër vjet.”

Për dhunën dhe forcën e policisë

I pyetur për përdorimin e forcës nga policia ndaj protestuesve, përfshirë studentë dhe të mitur, Tarran u përgjigj se “dhuna, në përgjithësi, nuk mund të jetë pjesë e jetës demokratike”, por se kjo çështje nuk mund të diskutohet pa folur edhe për format e tjera të dhunës. “Na vjen shumë keq që ka pasur kaq shumë incidente të dhunshme në Tiranë”, shtoi ai, duke iu referuar javëve të fundit.

Ambasadori vlerësoi edhe nismën “Thuaje” në Elbasan, me 55 panele diskutimi, duke thënë se i pëlqen emri i saj, që sipas tij e përmbledh nevojën që qytetarët të flasin dhe të dëgjohen. Java Evropiane e Demokracisë Lokale mbledh në Elbasan 135 organizata dhe partnerë ndërkombëtarë. Deklaratat e tij erdhën në ditën e 16-të të protestës studentore, ndërsa kryeministri Rama ripërsëriti ftesën për dialog me studentët dhe pedagogët, të cilët e kanë refuzuar duke kërkuar dorëheqjen e tij.