Sot aktgjykimi për Millorad Gjokoviqin, i akuzuar për krime lufte në Ozdrim të Pejës

Gjykata në Prishtinë pritet të shpallë sot, në orën 13:30, aktgjykimin ndaj Millorad Gjokoviqit, i akuzuar për krime lufte kundër popullsisë civile shqiptare në rajonin e Pejës gjatë viteve 1998–1999. Seanca do të mbahet në Pallatin e Drejtësisë.

Çfarë thotë aktakuza

Aktakuza ndaj Gjokoviqit është ngritur më 23 qershor 2023. Sipas saj, ai si pjesëtar i forcave policore dhe ushtarake serbe ka marrë pjesë në fshatin Ozdrim të komunës së Pejës dhe në fshatrat përreth në vrasje, bastisje, rrahje, torturë, arrestime, trajtim çnjerëzor, mbajtje në kushte robërie si dhe në dëbimin dhe deportimin e dhjetëra civilëve shqiptarë.

Prokuroria e akuzon edhe për plaçkitjen, djegien dhe shkatërrimin e shtëpive të civilëve shqiptarë. Aktakuza përshkruan se në sulmin mbi Ozdrimin u vranë gjashtë civilë shqiptarë. Tre persona të tjerë që u plagosën u dërguan në spitalin e Pejës, nga ku më pas u ekzekutuan dhe trupat e tyre u varrosën në Lutogllavë. Pesë civilë të tjerë figurojnë ende si të zhdukur.

Akuza sipas ligjit jugosllav

Gjokoviq akuzohet për bashkëkryerje të veprës penale “krim lufte kundër popullsisë civile” sipas nenit 142, lidhur me nenin 22 të Ligjit Penal të RSFJ-së, që ishte në fuqi në kohën kur ndodhën ngjarjet. Sipas praktikës gjyqësore në Kosovë, rastet e krimeve të luftës gjykohen sipas ligjit në fuqi në kohën e kryerjes së veprës, përveç kur ligji i mëvonshëm është më i favorshëm për të akuzuarin.

Gjykimi i tij vjen në një periudhë kur çështja e të zhdukurve dhe e krimeve të luftës është sërish në qendër të vëmendjes. Vetëm mbrëmë, në seancën e Këshillit të Sigurimit të OKB-së, Kosova dhe disa vende anëtare i kërkuan Serbisë hapjen e arkivave ushtarake për të zbardhur fatin e 1,577 personave që ende kërkohen nga lufta.