Shkolla e vjetër e Drenovës shndërrohet në “Shtëpia e Manit”, muze dhe punishte për rakinë tradicionale të Korçës

Fshati Drenovë i Korçës ka një hapësirë të re kushtuar një prej traditave më të njohura të zonës: prodhimit të rakisë së manit. “Shtëpia e Manit” u hap në godinën e shkollës së vjetër të fshatit, e cila u restaurua dhe u kthye në muze të rakisë, në laborator për prodhimin dhe përpunimin e frutave dhe në hapësirë për shitjen e promovimin e produkteve vendase, njoftoi ATSH.

Nisma u bë e ditur nga kryetari i Bashkisë së Korçës, Sotiraq Filo. Projekti është realizuar nga Fondi Shqiptar i Zhvillimit në bashkëpunim me bashkinë dhe bën pjesë në programin “Rrugët e Shijes”, që synon të krijojë pika për prodhimin dhe promovimin e produkteve tipike të fshatrave korçare.

Sheshi i ri, për panaire dhe punëtori

Përveç godinës, u rindërtua i gjithë sheshi i fshatit, i cili tani ka hapësira për punëtori, panaire, tregje dhe aktivitete të komunitetit. Sipas Filos, përmes këtyre hapësirave traditat dhe produktet karakteristike të fshatrave të Korçës bëhen pjesë e një oferte të re turistike, duke krijuar mundësi për prodhuesit vendas dhe duke u dhënë vizitorëve rastin të provojnë shijet dhe mikpritjen e zonës.

“Shtëpia e Manit” është hapësira e dytë e këtij lloji në rrethinat e Korçës, pas “Shtëpisë së Qershive” në fshatin Qatrom, e ngritur me të njëjtin koncept.

Drenova, fshati i Asdrenit

Drenova, në rrëzë të malit të Moravës, njihet edhe si vendlindja e poetit Aleksandër Stavre Drenova (Asdreni), autorit të tekstit të himnit kombëtar. Raki e manit, e prodhuar prej shekujsh nga familjet e zonës, është një nga produktet që Korça kërkon ta lidhë gjithnjë e më shumë me turizmin kulturor dhe gastronomik.