Serbët e Kosovës drejt qendrave të votimit në Serbi: deri në 3 orë pritje në Jarinjë, EULEX shton praninë

Mijëra serbë nga Kosova kaluan të dielën në Serbi për të votuar në zgjedhjet e parakohshme parlamentare, pasi Komisioni Republikan Zgjedhor kishte vendosur që votuesit me banim në Kosovë të votojnë në 60 vendvotime në komunat Rashkë, Tutin, Vranjë dhe Kurshumli.

Radhë kilometrike në kufi

Sipas Qendrës Kombëtare për Menaxhimin e Kufirit, të cituar nga Top Channel në paradite, pritja për të dalë nga Kosova ishte 90 deri në 120 minuta në disa pika kalimi, ndërsa për hyrje 30 deri në 40 minuta. Në Merdar pritja arriti në një orë e gjysmë deri në dy orë, me një kolonë prej 3,000 metrash, ndërsa në Jarinjë deri në tri orë.

Sipas revistës serbe Vreme, autobusët e parë u nisën nga Mitrovica e Veriut rreth orës 5 të mëngjesit drejt Rashkës, ndërsa të tjerë u drejtuan për në Ribariq të Tutinit, Kurshumli dhe Vranjë. Gjatë ditës, një grup tjetër votuesish që punojnë në institucionet serbe në Kosovë u nis nga Zveçani dhe Mitrovica.

Rrëzime në radhë

Sipas portalit KoSSev, të cituar nga Vreme, dy gra u rrëzuan pa ndjenja në një vendvotim në Rashkë në gjysmën e parë të orës pas hapjes, ndërsa një grua nga Mitrovica u lëndua në turmë. Djali i saj tha se ajo votoi pavarësisht problemeve të rënda shëndetësore, nga frika për pasoja në punë.

Misioni i BE-së për sundimin e ligjit, EULEX, njoftoi se që në mëngjes, në koordinim me Policinë e Kosovës dhe KFOR-in, shtoi praninë pranë pikave të kalimit administrativ me Serbinë qendrore për të monitoruar situatën gjatë zgjedhjeve.