REL: Serbët e Kosovës flasin për presione për të votuar SNS-në në zgjedhjet e 25 tetorit në Serbi

Votuesit serbë nga Kosova përballen me presione para zgjedhjeve parlamentare të parakohshme në Serbi, të së dielës më 25 tetor, sipas një hulumtimi të Radios Evropa e Lirë. Katër burime, që folën në kushte anonimiteti nga frika se do të humbin vendin e punës, thanë se punonjësit e institucioneve që funksionojnë nën autoritetin e Beogradit nxiten të votojnë për Partinë Përparimtare Serbe (SNS) të presidentit Aleksandar Vuçiq.

Sipas tyre, presioni vjen edhe nga zyrtarë të Listës Serbe, e cila qeveris dhjetë komunat me shumicë serbe në Kosovë. Njëri prej tyre tha se punonjësit marrin urdhra nga drejtorët për kë duhet të votojnë.

Listat e “votave të sigurta”

Një burim tjetër rrëfeu se në shtator mori një formular të SNS-së ku i kërkoheshin emrat, adresat dhe numrat e telefonit të 30 personave, votat e të cilëve partia do t’i “siguronte”. Dy të tjerë thanë se ishin regjistruar vetë në lista të tilla. Kodi Penal i Serbisë parasheh deri në tre vjet burg si për ndikimin në votim me forcë ose kërcënim, ashtu edhe për blerjen e votës.

Votimi përtej kufirit

Nga rreth 6.45 milionë votues të regjistruar në Serbi, mbi 115 mijë kanë adresë në Kosovë. Ata do të votojnë në 60 vendvotime në katër komuna afër kufirit: Vranjë, Rashkë, Tutin dhe Kurshumli. Që nga viti 2022, pasi Prishtina nuk lejoi hapjen e vendvotimeve në territorin e saj, votuesit transportohen me autobusë drejt Serbisë. Në zgjedhjet e fundit, pjesëmarrja e tyre ishte nën 25%, dhe mbi 80% e atyre që votuan mbështetën koalicionin në pushtet.

Shteti serb është punëdhënësi më i madh në zonat me shumicë serbe, me mbi 30 mijë punonjës. Organizata serbe CRTA ka evidentuar raste presioni në të paktën 16 qytete e komuna në Serbi. SNS dhe Lista Serbe nuk iu përgjigjën pyetjeve të REL-it deri në publikim.

Ndërkohë, në Kosovë vijon debati politik për mënyrën e votimit të serbëve, ndërsa Prishtina i quan të paligjshme institucionet paralele që financon Beogradi.