OKB voton sërish kundër embargos ndaj Kubës, mbështetja më e ulët e 30 viteve; SHBA dëbon një diplomat kuban

Asambleja e Përgjithshme e OKB-së miratoi të mërkurën, si çdo vit, rezolutën që i kërkon SHBA-së t'i japë fund embargos ndaj Kubës, por me mbështetjen më të ulët që nga viti 1995. Rezoluta mori 130 vota pro, 17 kundër dhe 25 abstenime, ndërsa një vit më parë ajo ishte mbështetur nga 165 vende. SHBA dhe Izraeli votuan kundër.

Zhvendosje në votim

Sipas Euronews, Gjermania, Italia dhe Letonia abstenuan për herë të parë në 34 vjet, ndërsa Kolumbia, Kosta Rika, Ekuadori, Maroku, Sllovenia dhe Bosnja votuan kundër, shumë prej tyre për herë të parë. Ambasadori amerikan në OKB, Mike Waltz, u shpreh i kënaqur që disa vende, mes tyre Gjermania dhe Koreja e Jugut, ndryshuan qëndrim. Ai mohoi se Kuba është nën bllokadë dhe tha se vuajtjet e kubanëve janë faji ekskluziv i “regjimit të korruptuar komunist”.

Ministri kuban i Jashtëm, Bruno Rodríguez, e akuzoi Uashingtonin se kërkon të “përcaktojë fatin e kombit” dhe të “rrëmbejë” pasuritë e vendit. Rezolutat e Asamblesë nuk janë ligjërisht detyruese dhe heqja e embargos, në fuqi që nga viti 1960, kërkon ndryshime në ligjin amerikan, ku vendimtar është Kongresi.

Përplasja në sallë dhe dëbimi

Debati u shoqërua me tension. Rodríguez iu afrua Waltzit dhe e akuzoi se gënjente, ndërsa ambasadori amerikan i kërkoi të largohej. Më pas, sipas ATSH-së që citon DPA-në, SHBA dëboi një diplomat të delegacionit kuban në OKB, emri i të cilit nuk u bë publik. Waltz tha se urdhrin e nënshkroi sekretari i Shtetit, Marco Rubio, dhe e akuzoi diplomatin se shtyu një diplomat amerikan dhe tentoi ta godiste. “Kjo është Amerika. Qëndroni prapa!”, tha Waltz. Në një letër drejtuar sekretarit të Përgjithshëm, António Guterres, Kuba pretendon se diplomati i saj u provokua nga një përfaqësues amerikan.