Makina merr flakë në lëvizje në aksin Kardhiq–Delvinë, ndërron jetë në Spitalin e Traumës 37-vjeçari

Një 37-vjeçar ka ndërruar jetë në Spitalin e Traumës në Tiranë, pasi automjeti që drejtonte mori flakë ndërsa ishte në lëvizje në aksin rrugor Kardhiq–Delvinë. Viktima është Maridon Dhuli, i cili sipas Euronews Albania është banor i fshatit Fterrë.

Ngjarja ndodhi të mërkurën në mbrëmje, pranë vendit të quajtur Skërficë. Automjeti, një Volkswagen Touran, u përfshi papritur nga flakët, ndërsa shkaku i zjarrit ende nuk është sqaruar.

Kalimtari që ndërhyri

Sipas raportimeve, një kalimtar nga Saranda, me inicialet S.A., që po udhëtonte nga Tirana, ndaloi në vendngjarje dhe përdori xhaketën e tij për të shuar flakët në trupin e shoferit. Ai njoftoi gjithashtu spitalin dhe shërbimet e policisë rrugore.

37-vjeçari, me djegie të shkallës së tretë, mori ndihmën e parë në urgjencën e Sarandës. Për shkak të gjendjes së rëndë, ai u transferua me ambulancë drejt Spitalit të Traumës në Tiranë, ku të enjten u konfirmua se nuk i mbijetoi plagëve.

Hetimet

Për shuarjen e zjarrit në automjet u desh ndërhyrja e zjarrfikësve. Policia ka nisur hetimet për të përcaktuar shkakun e rënies së zjarrit.

Aksi Kardhiq–Delvinë, i përfunduar vitet e fundit, është rruga kryesore që lidh Gjirokastrën me Sarandën dhe është shumë e frekuentuar, veçanërisht gjatë sezonit turistik.

Fuoristrada bie nga ura në Fier–Lushnjë

Natën e së enjtes, rreth orës 01:00, një tjetër aksident i rëndë ndodhi në autostradën Fier–Lushnjë, pranë rrethrrotullimit të Kolonjës. Drejtuesi i një fuoristrade humbi kontrollin, mjeti kaloi barrierat metalike dhe ra nga ura në një kanal rreth pesë metra më poshtë. Zjarrfikësit e Lushnjës dhe stafi i urgjencës nxorën nga mjeti dy bashkëshortët, të cilët u dërguan në spitalin e Lushnjës me lëndime të shumta. Sipas policisë rrugore, shpejtësia e lartë dhe asfalti i lagur nga shiu dyshohen si shkaqet e aksidentit.