Franca krijon “Prix Pascal”, çmimin letrar për veprat e shkruara me ndihmën e inteligjencës artificiale

Në Francë ka lindur një çmim letrar i ri, i dedikuar posaçërisht veprave të shkruara me ndihmën e inteligjencës artificiale. Sipas agjencisë gjermane DPA, të cituar nga ATSH, “Prix Pascal” është i hapur për të gjithë, pavarësisht përvojës letrare apo shtetësisë, me kusht që tekstet të jenë të pabotuara dhe të shkruara në frëngjisht.

Pjesëmarrësit mund të dërgojnë veprat deri në fund të nëntorit. Juria do të përzgjedhë dhjetë finalistë po në fund të nëntorit, ndërsa fituesi do të shpallet në fillim të dhjetorit. Përveç një shpërblimi financiar, shuma e të cilit nuk është bërë e ditur, fituesi do të ketë botimin e veprës dhe ekspozim në media.

Pse Pascal

Çmimi mban emrin e Blaise Pascalit (1623–1662), matematikanit, fizikanit, filozofit dhe teologut francez, autor i “Mendimeve” dhe shpikës i një makine mekanike llogaritëse. Organizatorët e paraqesin atë si një figurë që bashkoi përparimin e makinerive me zotërimin e gjuhës.

Debati për autorin njerëzor

Nisma vjen në një kohë kur industria e librit debaton gjithnjë e më shumë për rolin e IA-së në shkrim, për vendin e autorit njerëzor dhe për mënyrën si duhen vlerësuar veprat e krijuara me ndihmën e saj. Së fundmi, romani i autorit kanadezo-haitian Thelyson Orelien u përjashtua nga Çmimi Goncourt për dyshime se ishte përdorur inteligjenca artificiale. Orelien i tha së përditshmes “Libération” se e kishte përdorur IA-në vetëm për kërkime, por botuesi i tij kanadez më pas e ndërpreu bashkëpunimin, pasi informacione të reja i forcuan dyshimet.