Eslin Kurti e 15-ta në Junior Eurovision me “Kërce me mua”, Armenia fiton në Maltë me Narén

Eslin Kurti e mbylli rrugëtimin e saj në Junior Eurovision 2026 në vendin e 15-të, me 62 pikë, në finalen që u zhvillua të shtunën në Qendrën e Panaireve dhe Konventave të Maltës në Ta' Qali. Me këngën “Kërce me mua”, me tekst dhe muzikë të Enis Mullajt dhe Eriona Rushitit, përfaqësuesja e RTSH-së doli e 14-ta në skenë mes 16 vendeve pjesëmarrëse.

Shqipëria mori 19 pikë nga juritë kombëtare dhe 43 nga votimi online i publikut. Sipas tabelave të konkursit, kjo është renditja e dytë më e ulët e Shqipërisë në historinë e saj në Junior Eurovision. Pikët e jurisë shqiptare i njoftoi Viola Gjyzeli, ndërsa finalen e komentoi për RTSH Andri Xhahu.

Armenia fiton për herë të tretë

Fituese e edicionit të 24-t u shpall Naré nga Armenia me këngën “Boo!”, që grumbulloi 202 pikë, 103 nga juritë dhe 99 nga publiku, duke fituar edhe votimin online. Është trofeu i tretë i Armenisë në këtë konkurs. E dyta u rendit Spanja me Lucas Paulanon dhe 184 pikë, ndërsa e treta Franca me Alecun dhe 165 pikë. San Marino dhe Gjeorgjia plotësuan pesëshen e parë.

Nga vendet e rajonit, Mali i Zi me Mija Vujović u rendit i 12-ti me 68 pikë, kryesisht falë votës së publikut, ndërsa Maqedonia e Veriut me Ana Stojanoskën mbylli tabelën me 57 pikë. Rezultati u përcaktua në masën 50% nga juritë e të 16 vendeve dhe 50% nga votimi online. Kurti kishte fituar biletën për Maltë në qershor, me fitoren në Festivalin Mbarëkombëtar të Këngës për Fëmijë në Shkodër.