Dita e 11-të e protestës: studentët e Mjekësisë me bluza të bardha në marshim, mbrëmja kalon pa incidente

Protesta e studentëve në Tiranë hyri të premten në ditën e 11-të. Pedagogë dhe studentë u mblodhën në mëngjes para Universitetit Politeknik dhe marshuan drejt Kryeministrisë, duke thirrur "Bashkohuni me ne" dhe "Studentët e bashkuar kanë për të fituar". Para Kryeministrisë atyre iu bashkuan studentët e Mjekësisë, me bluza të bardha dhe maska kirurgjikale.

Në emër të mjekëve, stomatologëve, farmacistëve dhe punonjësve të tjerë të shëndetësisë u lexua një deklaratë mbështetëse, që kërkonte që protesta të mbetet paqësore dhe dënonte dhunën ndaj studentëve dhe ndaj atyre që u jepnin ndihmën e parë të plagosurve. Kreu i Sindikatës së Mjekëve, Gentian Stroni, u bëri thirrje të dyja palëve për përmbajtje, ndërsa kreu i Sindikatës së Pedagogëve, Aleksandër Kovaçi, tha se do të jenë pranë studentëve kudo që të jenë.

Stolat e dialogut rrokullisen

Protestuesit e refuzuan sërish ftesën e kryeministrit Edi Rama për dialog. Disa të rinj u panë duke rrokullisur nëpër bulevard stolat prej betoni të vendosura para Kryeministrisë, ndërsa jastëkët dhe fletët me mbishkrimin "Dialog" u hodhën. Rama reagoi në rrjetet sociale: "Studentë? JO! Pedagogë? JO! Po çfarë janë këta që duan vetëm rrëmujë?!"

Ndër kërkesat e lexuara ishin dorëheqja e kryeministrit, një qeveri tranzitore me përbërje teknike dhe kushte më të mira studimi e jetese për studentët.

Mbrëmje e qetë

Në mbrëmje, më pak se 100 të rinj qëndruan për disa orë para Kryeministrisë, nën vëzhgimin e një numri policësh, pa krijuar incidente. Thirrjet sporadike u përqendruan te organizimi i tubimit të së shtunës, që sipas organizatorëve do të jetë kombëtar.