194 protestues para gjykatës që nga nisja e protestave, 170 me detyrim paraqitjeje; mes tyre një 14-vjeçar

Që nga nisja e protestave rreth 11 ditë më parë, 194 persona të arrestuar për veprime gjatë tubimeve kanë dalë para Gjykatës Penale të Tiranës, sipas të dhënave të bëra publike të cituara nga Top Channel. 170 prej tyre janë lënë me masën "detyrim paraqitjeje", ndërsa për 24 të tjerë janë caktuar masa më të rënda.

Të premten gjykata shqyrtoi masat për dhjetë persona të arrestuar për pjesëmarrje në protesta të dhunshme dhe dëmtim të pronës publike e private. Arrestimi i tyre u konsiderua i ligjshëm dhe për të gjithë u vendos detyrim paraqitjeje.

Rrëzohen kufizimet shtesë

Për tetë prej protestuesve madhorë, prokuroria kërkoi edhe ndalimin e afrimit pranë institucioneve dhe në zonat ku zhvillohen tubime. Gjykata e rrëzoi këtë kërkesë. Seancat u zhvilluan në dy sesione të veçanta dhe me dyer të mbyllura.

Mes të arrestuarve ishte edhe një 14-vjeçar, i cili u shoqërua nga policia pasi kishte marrë pjesë në protestë. Gjyqtari për të miturit e shpalli të ligjshëm arrestimin dhe vendosi edhe për të detyrim paraqitjeje.

I mituri A.B. lirohet

Sipas ATSH, gjykata urdhëroi gjithashtu lirimin e menjëhershëm të një të mituri me inicialet A.B., i arrestuar në flagrancë më 20 tetor në orën 23:30, i dyshuar për rezistencë ndaj policit të rendit publik dhe shkatërrim prone. Ai duhet të paraqitet çdo të hënë të parë të muajit në orën 10:00 te policia gjyqësore e Prokurorisë së Tiranës. Seanca u zhvillua në prani të prindërve dhe psikologëve, ndërsa vendimi mund të ankimohet brenda pesë ditëve.