Shtatori me 1,985 biznese të reja: tregtia e turizmi kryesojnë, një në tri drejtohet nga një grua

Gjatë muajit shtator në Shqipëri u hapën 1,985 biznese të reja, sipas të dhënave të Qendrës Kombëtare të Biznesit (QKB), të raportuara nga ATSH. Shumica dërrmuese janë persona fizikë, 1,514, ndërsa 463 janë shoqëri me përgjegjësi të kufizuar. Listës i shtohen edhe 4 degë të shoqërive të huaja, 3 shoqëri aksionare dhe një shoqëri e thjeshtë.

Tirana mbizotëron

Kryeqyteti mbetet magneti i sipërmarrjes: 1,085 biznese, ose rreth 54.7% e totalit, u regjistruan në Tiranë. Pas saj vijnë Durrësi me 212, Vlora me 132, Shkodra me 104, Elbasani me 102 dhe Fieri me 100. Tirana dhe Durrësi së bashku zënë rreth 65% të regjistrimeve të muajit.

Ku investojnë sipërmarrësit

Tregtia me shumicë e pakicë, përfshirë riparimin e automjeteve, kryeson me 464 subjekte. Akomodimi dhe shërbimi ushqimor, sektor i lidhur ngushtë me turizmin, renditet i dyti me 220 biznese. Më tej vijnë veprimtaritë profesionale, shkencore e teknike me 186, informacioni e komunikimi me 166 dhe ndërtimi me 155. Prodhimi numëron 110 subjekte të reja, pasuritë e paluajtshme 67, ndërsa bujqësia, pylltaria e peshkimi vetëm 29.

Kapitali i huaj dhe gratë sipërmarrëse

Nga bizneset e reja, 1,717 janë tërësisht në pronësi shqiptare, 238 tërësisht në pronësi të huaj dhe 29 me pronësi të përzier, ndërsa një është shtetërore. Në total, 267 subjekte ose rreth 13.5% e regjistrimeve kanë kapital të huaj, plotësisht ose pjesërisht.

Të dhënat tregojnë edhe rritjen e rolit të grave në sipërmarrje: 653 nga bizneset e reja administrohen nga gra, rreth 32.9% e totalit, pra afërsisht një në tri.

Shifrat e shtatorit vijnë në një kohë kur bizneset e kryeqytetit po përballen edhe me pasojat e protestave të ditëve të fundit, ndërsa administrata tatimore po verifikon dëmet e raportuara nga dhjetëra subjekte.