Rama te “Kathimerini”: Nuk jap dorëheqjen, qeveritë ndryshojnë me votë, jo me molotovë

Kryeministri Edi Rama ka përjashtuar sërish dorëheqjen, pavarësisht protestave që prej dy javësh mbushin bulevardin para Kryeministrisë. Në një intervistë për gazetën greke “Kathimerini”, të publikuar të hënën, ai tha se në një demokraci qeveritë ndërrohen në zgjedhje dhe jo përmes dhunës.

“Jo. Në një demokraci, qeveritë ndryshojnë përmes zgjedhjeve, jo përmes bombave molotov”, u përgjigj Rama kur u pyet drejtpërdrejt nëse do të largohej. Ai kujtoi se shqiptarët i dhanë socialistëve “një mandat të qartë” vitin e kaluar dhe se synon ta çojë atë deri në fund.

Studentët dhe “grupet me kapuçë”

Rama bëri dallim mes studentëve që, sipas tij, kërkojnë një të ardhme më të mirë dhe grupeve të maskuara që hedhin molotovë, sulmojnë godina publike dhe dëmtojnë pronën private. Disa prej tyre, tha ai, i ka lidhur me lëvizjen “Antifa”. “Një pakicë beson se t’i vësh flakën vendit është rruga më e shkurtër drejt pushtetit”, deklaroi kryeministri.

Ai pranoi se shqetësimet e të rinjve për arsimin, koston e jetesës dhe mungesën e mundësive janë “të vlefshme” dhe kërkojnë përgjigje. Sipas Ramës, buxheti i vitit 2027, që qeveria do ta paraqesë së shpejti, përfshin masa shtesë për familjet, shërbimet publike dhe studentët. Ai tha se është gati të shqyrtojë çdo propozim serioz, edhe nga kritikët më të ashpër.

Korrupsioni, punë e drejtësisë

Për kërkesat e protestuesve kundër korrupsionit, Rama u përgjigj se kjo është përgjegjësi e institucioneve të drejtësisë dhe jo e atyre që përdorin dhunën për të pretenduar se flasin në emër të një brezi të tërë. “Çdokush mund të kërkojë dorëheqjen time, kjo është pjesë e jetës demokratike. Askush nuk ka të drejtë ta imponojë atë me forcë”, tha ai, duke shtuar se do të vazhdojë punën për anëtarësimin e Shqipërisë në BE. Intervista erdhi në ditën e 14-të të tubimeve, të cilat këtë herë kaluan pa përplasje.