Rama rifton studentët në dialog, protestuesit sërish te Ministria e Arsimit kërkojnë dorëheqjen e tij

Kryeministri Edi Rama u ka bërë sërish thirrje studentëve dhe pedagogëve që vijojnë protestën të ulen në tryezën e dialogut. Ai publikoi në rrjetet sociale pamje të një tryeze guri me mbishkrimin “Dialog” dhe deklaroi se qeveria është e gatshme të shqyrtojë çdo propozim të tyre dhe të adresojë shqetësimet e ngritura.

Rama theksoi njëkohësisht se “askush nuk mund ta gjunjëzojë shtetin përmes dhunës apo duke u fshehur pas figurës së studentit”.

Bursat, strehimi dhe praktikat

Një ditë më parë, kryeministri u ishte drejtuar studentëve me disa premtime ekonomike. Sipas tij, bursat për të gjithë studentët nga familjet në vështirësi ekonomike do të rriten me 15 mijë lekë të reja. Ligji i ri për strehimin, që ndodhet në Kuvend, parashikon përfitime për studentët dhe çiftet e reja, nga qira të bashkëfinancuara nga qeveria deri te kredi me interes zero ose 3%, sipas kritereve të ligjit. Rama paralajmëroi edhe ndryshime për praktikat dhe punësimin, përfshirë bizneset që punësojnë studentë me gjysmën e pagës minimale.

Protesta vijon

Protestuesit e kanë refuzuar deri tani ftesën dhe kërkojnë dorëheqjen e kryeministrit. Të enjten, studentët u mblodhën sërish para Ministrisë së Arsimit, me thirrje kundër qeverisë dhe policisë, sipas ATSH-së. Në mëngjes, një grup qytetarësh protestoi para Kuvendit, ku policia kishte vendosur barriera metalike; nuk u raportuan incidente.

Studentët dhe qytetarët protestojnë prej 17 ditësh para Ministrisë së Arsimit dhe Kryeministrisë. Në disa prej protestave të mëparshme ka pasur përplasje të dhunshme me policinë dhe dëme në institucione, biznese dhe sinjalistikë rrugore.