Komisioni Europian: Shqipëria e parafundit në rajon për rritjen në tremujorin e dytë, investimet ngadalësohen në 1.8%

Ekonomia shqiptare u rrit me 3.6% në tremujorin e dytë të vitit 2026 krahasuar me një vit më parë, sipas raportit më të ri ekonomik të Komisionit Europian për vendet kandidate, të analizuar nga revista Monitor. Ritmi është pak më i ulët se 3.7% e tremujorit të parë dhe përkon me mesataren e ponderuar të Ballkanit Perëndimor, por e vendos Shqipërinë në vendin e parafundit në rajon: vetëm Bosnja e Hercegovina, me 2.4%, u rrit më ngadalë.

Investimet frenojnë, konsumi mban ekonominë

Shqetësimi kryesor në raport janë investimet. Rritja e tyre ra në 1.8%, nga 4% në tremujorin e parë dhe 9.9% në tremujorin e fundit të 2025-ës. Sipas Komisionit, Shqipëria ishte i vetmi vend i rajonit ku investimet u ngadalësuan në tremujorin e dytë, ndërkohë që në Maqedoninë e Veriut ato u rritën me 16.5% dhe në Mal të Zi me 26.5%, kryesisht falë shpenzimeve kapitale publike.

Motori kryesor i rritjes mbetet konsumi privat, i cili u zgjerua me 4.6%, niveli më i lartë në rajon, i ndjekur nga Kosova me 4.4%. Raporti e lidh këtë me rritjen e fortë të pagave.

Rajoni përshpejton

Mesatarja e rritjes në Ballkanin Perëndimor u ngjit në 3.6%, nga 3.2% në tremujorin e parë, ritmi më i shpejtë që nga mesi i vitit 2024. Maqedonia e Veriut u rrit me 4.3%, Kosova me 4.1%, ndërsa Serbia dhe Mali i Zi me nga 3.8%.

Financat publike dhe llogaria korrente

Në anën pozitive, llogaria korrente e Shqipërisë kaloi në një tepricë të lehtë prej 0.2% të PBB-së, e matur për katër tremujorët e fundit, falë eksporteve të shërbimeve dhe sidomos turizmit. Shqipëria dhe Kosova janë të vetmet ekonomi ku investimet e huaja direkte neto mbulojnë më shumë se dy të tretat e deficitit korrent. Buxheti shënoi tepricë më të madhe në tetë muajt e parë, ndërsa borxhi publik zbriti në 49% të PBB-së në fund të qershorit, 3.9 pikë përqindjeje më pak se në fund të vitit 2025.

Raporti vëren gjithashtu se inflacioni mesatar vjetor në rajon u rrit në 4% në tremujorin e dytë, i shtyrë nga ushqimet, transporti dhe energjia, ndërsa bankat qendrore me politikë monetare të pavarur i lanë normat e interesit të pandryshuara në tremujorin e tretë.